BUTUAN CITY – Dismayado si Senador Ronald “Bato” dela Rosa sa pamahayag ni Executive Secretary Lucas Bersamin nga mahimo siyang arestuhon kung mag-isyu ang International Criminal Court (ICC) og arrest warrant batuk kaniya.
Nasayran sa usa ka interview nga gipadayag ni Bersamin nga pareho ra ang himuon sa Philippine government kang Dela Rosa dihang gipa-aresto si kanhi Pangulong Rodrigo Duterte, ug gitugyan ngadto sa ICC niadtong Marso.
Tubag ni Senador Bato, kung gusto matud pa sa administrasyon nga subling muhimo sa maong sayop, mahimo nila kining ipadayon dungan sa pagbutyag nga gibarugan sa mga ka-alyado ni Duterte nga “extraordinary rendition” ang gihimo ngadto sa kanhi presidente, tungod sa pagtugyan kaniya ngadto sa foreign jurisdiction nga wala’y due process apan gipamugos sa Malakanyang nga nasubay matud pa kini sa balaud.
Samtang gipadayag ni Communications Undersecretary Claire Castro nga wala makadawat ang palasyo og bisan unsa man nga official communication kalabot sa mga warrants alang sa mga co-perpetrators ni Duterte kinsa nadetine karon sa ICC detention center sa The Hague, Netherlands, nag-atubang og kasong extrajudicial killings tungod sa war on drugs sa iyang administrasyon.
Si Dela Rosa, nga mao ang kanhi hepe sa Philippine National Police, mao ang key implementer sa maong kampanya.
Sigon ni Dela Rosa, gigamit karon sa Malakanyang ang iyang kaso aron ma-divert ang atensyon sa publiko gikan sa kasamtangang mga kontrobersiya ilabina ang pagkutay kang First Lady Liza Marcos ngadto sa kamatayon sa Filipino business executive didto sa Estados Unidos tungod sa drug overdose.
Gikumpirma usab sa senador nga dili siya mutambong sa ika-upat nga State of the Nation Address (SONA), ni Pangulong Marcos karong Hulyo 28 atol sa joint session sa Kongreso.
Gipadayag niining dili siya magpaka-plastic tungod kay duna’y mga tawo sa Kamara ug sa Malakanyang nga dili siya gahanan ug dili niya gustong pahiyuman kung iyang maka-agbat.
