BUTUAN CITY – Nagplano si Kalayaan Vice Mayor Maurice Philip Albayda nga personal nga moadto sa Metro Manila sunod semana aron isubmite ang ilang Sangguniang Bayan resolusyon nga nagkondena ug naghangyo nga papason ang pamahayag ni Senador Rodante Marcoleta bahin sa pagsurender sa Kalayaan Island Group (KIG).
Sa eksklusibong pakighinabi sa Bombo Radyo Philippines, gikumpirma ni Vice Mayor Albayda nga gi-aprobahan sa tanang miyembro sa Sangguniang Bayan sa Kalayaan ang maong resolusyon nga wala’y bisan usa nga misupak kon “unanimous” ang pag-apruba.
Tumong lamang nila ang pagpanalipod sa dignidad ug integridad sa ilang lungsod.
Sumala sa opisyal, gawas sa Commission on Appointments (CA), magsubmite usab siya og kopya sa resolusyon ngadto sa opisina ni Senate President Vicente “Tito” Sotto III.
Kahinumdumang atol sa pagdungog sa Commission on Appointments sa Senado niadtong Pebrero 4, gibutyag ni Senador Marcoleta nga mas maayo matud pa nga isurender na lamang ang Kalayaan Island Group (KIG) tungod kay dili matud pa kini sakop sa exclusive economic zone (EEZ) sa Pilipinas.
Apan gipanghimakak kini Albayda dayong butyag nga walay kalabutan ang exclusive economic zone sa territorial integrity tungod kay lahi kini nga mga isyu.
