BUTUAN CITY – Hingpit nang narekober ang usa ka sakyanan nga gipanag-iyahan sa provincial fire marshall sa Bureau of Fire kon BFP-Agusan Del Sur human nag kini gi-carnapped sa dihang gilungkab ang ilang sattelite office sa may Villa Kananga ning dakbayan.
Nasayran nga mga alauna sa kaadlawon sa dihang gisulod sa mga kawatan ang usa ka apartment sa maong dapit diin lakip sa nalungkab ang sattelite office sa BFP-Agusan Del Sur.
Human nakabit-bit ang wala mailang mga kawatan, gidala usab niini ang sakyanan nga Honda Civic nga dunay plaka numero YBT 284 ug pribadong sakyanan ni Fire Supt. Antonio Ortiz, Provincial Fire Marshall sa BFP-Agusan Del Norte.
Sa pagkadiskubre sa opisyal nga dunay nawalang mga gamit sa opisina og kwarta lakip na ang sakyanan niyang giparking, dali kining mitaho sa Butuan City Police Station-1.
Sa gihimung pagpanubay sa kapulisan, nakit-an nila ang gi-carnapped nga sakyanan sa may Employees Village, Barangay Libertad Butuan City.
Sa ekslusibong pakighinabi ning sibyahan sa tag-iya nga si Fire Supt. Antonio Ortiz, nagtoo kini nga kawat lang ang tuyo sa mga suspetsado apan sa dihang nakita ang yawe, ila nalang gidala ang sakyanan.
Samtang giklaro ni P/ Senior Insp. Jorge Castañeda, Deputy Chief sa Regional Highway patrol Unit kon RHPU-Caraga nga sa Butuan City Police Station-1 ang disposasyon sa maong sakyanan diin atua usab ang reklamante lakip na usab ang dugang imbestigasyon niini.
Napadali matud pa ang pagrekober sa sakyanan tungod sa hiniusang puwersa sa mga personahe sa BCPD-1 ug RHPU-Caraga.
Nasayran usab nga dunay usa pa ka reklamante nga nailang si Myrna Lorema Blangkas ang midangop sa kapulisan human gilungkab usab ang iyang balay nga silingan lang sa nahitaboan. Nagtoo pa kini usa lang ang mihimu sa ingon.
