BUTUAN CITY – Nagtapok ang LGBTQ community sa Agusan del Sur kagahapong adlawa sa DATU LIPOS MACAPANDONG CULTURAL CENTER aron makisadya sa pagsaulog sa Naliyagan Festival 2022.
Nasayrang gituyo nga gahinan sa probinsiyal nga kagamhanan sa Agusan Del Sur og panahon nga magtapok ang LGBTQ community aron ilang mabati kon unsa ka mahinungdanon ang ilang hut-ong sa katilingban.
Muabot sa kapin 200 sa mga miyembro niini ang misalmot sa kalihukan. Atol sa panagtapok dunay gipahigayon nga symposium mahitungod sa HIV-AIDS advocacy nga gidumala ni Franco Olaer, lakip na usab ang libreng HIV Testing, Pedicure, Manicure ug Facial services.
Nasayrang base sa rekord sa Department of Health kon DOH-Caraga, nanguna sa listahan ang lungsod sa San Francisco, Agusan Del Sur sa pinakadaghang kaso sa HIV sa rehiyon.
Kini human nakatala ang lungsod og 43 ka mga kas sa HIV as of Hulyo 2021. Gisundan kini sa Prosperidad, Agusan del Sur nga dunay 38 ka kaso, Trento, Agusan Del Sur nga dunay 21, Buenavista, Agusan Del Norte nga dunay 18, 17 usab sa Tago, Surigao Del Sur, 16 sa Nasipit, Agusan Del Norte og Lingig, Surigao Del Sur nga dunay 14 ka kaso sa HIV.
