BUTUAN CITY – Gibatikos ni Engr. Dioric Gavino, Secretary General sa Sara All Movements, ang pagtudlo kang Jesus Crispin Remulla isip bag-ong Ombudsman sa rasong wala matud pa masubay sa balaod ug nagpakita sa padayon nga problema sulod mismo sa gobyerno.
Sumala ni Gavino, kabalo na ang katawhan sa mga lihok sa administrasyon ug bisan unsa pa ang buhaton niini, si Remulla na lang ang ilang alas. Apan ang responsibilidad karun, sumala ni Gavino, anaa na sa bag-ong Ombudsman kung buhaton ba niya ang angay buhaton, samtang ang publiko padayon nga nagmatngon ug nakabalo sa kahimtang sa nasud.
Dugang pa ni Engr. Gavino, klaro na nga si Vice President Sara Duterte ang unang target ni Remulla nga iyang trabahuon tungod kay mao na matud pa kini ang kataposang lakang nga ilang himuon.
Subay niini, gidasig ni Gavino ang katawhan nga magmatngon, kay kabalo na ang publiko sa dagan sa gobyerno ug sa mga lihok nga posibleng magamit batok sa mga lider nga ilang gisuportahan.
