BUTUAN CITY – Nakig-areglo na si Police Capt. Carter Yamba sa mga nalambigit nga indibidwal human kini nadisgrasya alas 10:00 sa gabii sa PNP checkpoint, Barangay Bancasi ning siyudad sa Butuan.
Saysay pa ni Police Capt. Emmerson Alipit, tigpamaba sa Butuan City Police Office kon BCPO, gikan sa Buenavista, Agusan Del Norte si Police Capt. Yamba nga nadestino sa Burgos Municipal Police Station, sakay sa itom nga sakyanan og padulong ning dakbayan.
Pag-abot sa nahitaboan, wala niini mabantayan ang mulitcab nga mihunong sa checkpoint rason nga nabanggaan niini ang lubot nga bahin ang multicab nga maoy mibangga usab sa giharang sa maong checkpoint.
Tungod niini, nasamdan ang 2 ka pulis nga anaa sa checkpoint samtang dunay damyos usab ang pampasaherong multicab nga niadtong higayona ang drayber lang ug asawa niini ang sakay.
Sigon ni Alipit, kusog ang padagan ni Capt. Yamba nga nanimaho ug ilimnong makahubog.
Hinoon, nakig-areglo na kini diin tubagon ang tanang galastuhon sa pagpatambal sa 2 ka pulis samtang ang gastos usab human nadamyos ang multicab.
