BUTUAN CITY – Nag-atubang na og kasong rape with homicide ang usa ka 17-anyos nga bayong-bayong human niini gilugos ug gipatay ang iyang 3-anyos nga manghod nga babaye ning mi-aging gabii didto sa Sitio Narra, Brgy Nuing, lungsod sa Jose Abad Santos sa Davao Occidental.
Migawas sa imbestigasyon sa kapulisan nga hubog matud pang mi-uli ang suspetsado sa ilang panimalay kondiin iyang gikugos ang iyang manghod padulong sa copra drier kon pugon kansa 45-metros lang ang gilay-on gikan sa ilang panimalay ug didto gilugos.
Tungod sa kasaba sa bata nga nagpakitabang, gi-angkon sa suspek nga iyang giluba ang nawong niini ug gidakdakan og gahi nga butang ang ulo hinungdan sa kamatayon.
Samtang gipadayag usab sa mga ginikanan nga ila pang nadunggan ang bata nga nagpakitabang apan wala lang nila kini panumbaliga tungod kay ka-uban lage niini ang iyang maguwang.
Dihang ila nang gisusi tungod kay parehong wala na makabalik sa balay, dinhi na sila nakurat sa gidangatan sa bata rason nga daling gipangita ang suspetsado nga nadakpan ra usab uban sa tabang sa ilang mga silingan.
