BUTUAN CITY – Naka-abot na sa North Korea si Russian President Vladimir Putin kondiin gisugat siya og red carpet welcome sa pagsugod sa iyang unang pagbisita sa maong totalitarian state sa nakalabay’ng 24 ka mga tuig.
Gisugat siya ni North Korean leader Kim Jong-un aug gipalibutan sa military guard of honour kondiin pila ka minuto silang nagka-itorya.
Una nang nagkita ang duha ka lider niadtong Septembre ning mi-aging tuig sa Vostochny cosmodrome sa Russia apan kini ang unang biyahe ni Putin ngadto sa Pyongyang sukad niadtong tuig 2000.
Mas milig-on ang relasyon sa duha ka nasud ning nakalabay’ng mga tuig ilabina sukad gisugdan sa Russia ang ilang full scale invasion sa Ukraine.
Laumang ubay-ubay nga kasabutan ang ilang pirmahan may kalabutan sa isyu sa seguridad ug pagpalig-on sa ilang alyansa.
Human sa North Korea, mubisita si Putin sa Vietnam sa Hunyo 19 hangtud 20.
Gikabalaka sa Estados Unidos ang pagbisita ni Putin sa Pyongyang ilabina nga gi-akusahan niini ang North Korea nga nag-suplay og mga armas sa Russia batuk sa Ukraine.
Bisan ang South Korea, nabalaka sa suod nga relasyon sa North Korea ug Russia tungod kay siguradong pakusgon nila ang ilang mga armas nga dakong kalapasan sa United Nations resolutions.
