BUTUAN CITY – Wala’y nakab-ot nga maayong resulta sa dayalogo tali sa mga representante sa Russia ug Ukraine nga gihimo sa Switzerland kansa gi-organisa sa United States ug ikatulo na karong tuiga, human sa una nga gihimo niadtong Enero sa Abu Dhabi.
Sumala ni Ukrainian President Volodymyr Zelenskyy, dili sayon ang nahitabo nga negosasyon human siya nakig-estorya sa iyang negotiating team nga mitambong sa maong panagpulong.
Una na niyang gi-akusahan ang Russia nga wala mu-uyon sa mga nasabutan atol sa negosasyon ilabina sa pipila ka ka-usaban nga gihisgutan sa miting, lakip na ang pagbalik sa Russia ngadto sa Ukraine sa mga teritoryong ilang gisakop.
Nagtuo siya nga sa mosunod nga mga adlaw, magpadayon pag-usab ang panag-istoryahanay tali sa Ukraine ug Russia.
