BUTUAN CITY- Gi-anonsyo sa Russia nga na-ila na ang tulo ka suspek sa pagpamusil batok kang Military General Lt. Gen. Vladimir Alexeyev sa Moscow.
Ang giingong responsable sa atake mao si Lyubomir Korba, usa ka Russian citizen nga natawo sa Ukraine, diin miabot sa Moscow niadtong Disyembre ubos sa mando sa Ukrainian intelligence, apan gilimod kini sa Kyiv.
Si Alexeyev, 64 anyos ug ikaduhang lider sa GRU military intelligence, nadala sa ospital ug nakabawi na human sa operasyon. Sumala sa Investigations Committee, mitira og tulo ka higayon ang suspek ug midagan paingon sa United Arab Emirates kon UAE, diin siya nadakpan ug gi-extradite. Nakaplagan sa mga imbestigador ang armas nga Makarov pistol nga adunay silencer.
Samtang personal usab nga nagpasalamat si Presidente Vladimir Putin sa UAE sa tabang sa pagdakop. Duha pa ka kauban ni Korba ang giingong nalambigit: si Viktor Vasin nga nadakpan sa Moscow ug gi-charge, ug si Zinaida Serebritskaya nga nakasibat paingon sa Ukraine. Ang insidente nagdugang sa listahan sa mga high-ranking Russian military officials nga nahimong target sukad sa pagsugod sa giyera batok sa Ukraine niadtong 2022.
