BUTUAN CITY – Ning saka na sa 59 ang mga namatay tungod sa flash floods sa Texas, USA.
Sigon sa pagkumperma ni ni Sherriff Larry Leitha, 43 sa maong mga namatay ang gikan sa Kerr County. Upat usab ang gikan sa Travis County, duha sa Burnet County, ug usa sa Tom Green County, ingon man anaa usab ang gikan sa Kendall County.
Subay niini, nagpadayon pa ang lapad nga search and rescue operation sa entiro estadu human nga wala pa gihapon makita ang 27 ka mga batang babaye nga nangawala tungod sa maong kalit nga pagbaha. Sayrang lakip ang maong mga bata sa usa ka Christian summer camp sa Guadalupe River.
Kahibaloang nakapadala pa og warning ang mga otoridad alang sa posibleng pagsaka sa water level sa Guadalupe River, apan wala ra’y usa ka oras, mi-igo gilayon ang dakong baha nga mibanlas sa mga naagi-an niining mobile homes, mga sakyanan ug mga holiday cabins nga maoy gisak-an sa mga tawo alang sa ilang July 4 weekend holiday.
Lakip ang mga nawalang mga batang babaye sa 750 ka mga mitambong sa Camp Mystic.
