BUTUAN CITY – Imbitaron sa House Tri-Committee (TriCom) — nga gitawag na karong House Infrastructure Committee, sa sunod nga pagdungog ang kanhi chairman sa House Committee on Appropriation nga si Rep Elizaldy Co ug ang counterpart niini sa Senado nga si Senador Grace Poe.
Kini aron matin-awan ang pagkalambigit ilabina ni Congressman Co isip proponent sa bilyunes pisos nga kantidad sa mga flood control projects base na sa gibulgar sa contractor nga si Pacifico ‘Curlee’ Discaya ug nakalatid usab sa iyang sworn affidavit.
Sigon ni Surigao Del Sur 1st District Representative Cong. Romeo Momo Sr, usa sa tulo ka chairpersons sa House Tri-Committee, nakurat silang mga kongresista sa mga gibulgar sa resource person nga si Engr Brice Ericson Hernandez, kanhi assistant district engineer sa Department of Public Works and Highways o DPWH-Bulacan.
Misaad usab ang kongresista nga duna’y manubag sa maong mga kahiwian partikular sa anumalusong flood control projects.
Kung makamugna na usab ang ehekutibo og independent body nga maoy muhimo sa imbestigasyon, ihunong na sa Kamara ang ilang imbestigasyon.
Unang naghimo og pagdungog kaghapong adlawa ang tri committee sa kamara, diin nahimong resource person niini si Engr. Brice Hernandez kansa nagbulabog sa mga illegal nga kalakaran matud pa nila Senador Joel Villanueva ug Senador Jinggoy Estrada tali sa DPWH.
