BUTUAN CITY – Gipasakahan sa Department of Justice (DOJ) karong adlawa og kasong qualified human trafficking si kanhi presidential spokesperson Harry Roque.
Kini may kalabutan sa kalambigitan matud pa sa nasangpit nga personalidad sa operasyon sa iligal nga Philippine Offshore Gaming Operators (POGO) sa Porac, Pampanga.
Sumala pa ni Justice Undersecretary Nicholas Felix Ty nga lakip sa gikasohan sila si Cassandra Ong, Wu Duanren sa Whirlwind Corporation, Dennis Cunanan ug laing 30 pa.
Dugang sa opisyal nga klaro matud pang may kalambigitan ang mga akusado sa paggamit sa institusyon para sa human trafficking.
Una nang gikasuhan sa Presidential Anti-Organized Crime Commission (PAOCC) ang Lucky South 99 authorized representative nga si Katherine Cassandra Li Ong ug uban pa.
Lakip usab si Roque sa supplemental complaint nga gisang-at niadtung Oktubre 2024.
Sumala ni Ty nga bisag abogado sa Whirlwind si Roque, personal matud pa gihapon kining niduaw sa Philippine Amusement Gaming Corporation (PAGCOR) para sa renewal sa application sa Lucky South 99.
