BUTUAN CITY – Gipaniguro ni Surigao del Sur First District Representative Romeo Momo Sr, chairman sa House Committee on Public Works and Highways, nga wala’y mga ghost control projects dinhi sa Caraga Region.
Sa eksklusibong pakighinabi sa Bombo Radyo Butuan, gibutyag sa kongresista nga kanhi usab regional director sa Department of Public Works and Highways kon DPWH-Caraga, nga gamay lang ang mga flood control projects ning rehiyon kansa gitukod sa mga lugar nga nanginahanglan niini.
Gipadayag pa niini nga ang mga contractors ug mga DPWH officials ug district engineers nga nalambigit sa mga anumalusong proyekto, mga baga na og nawong tungod kay wala man lang matud pa huna-hunaa nga ma-verify kini nga mga istraktura kansa gila-umang magtunhay og pipila ka mga dekada.
Sukwahi matud pa kini sa mga proyekto nga nakatutok lang sa mga consumables nga dali rang ma-report nga nahuman na o kaha nagamit na.
Gidugang sa kongresista nga dili matud pa kini mahitabo kung maayo pa ang pagdumala sa mga opisyal sa DPWH sa mga proyekto. Garapalan na matud pa ang mga nagpaluyo sa mga anumaluso ug ghost control projects tungod kay daghan ang nagtan-aw palibot sa project sites apan nahimo gihapon nilang kurakuton ang dakong pundong alang unta sa kaayuhan sa katawhan.
Ang dili lang niya matubag nga mga pangutana, kung nganong wala’y kasayuran ang kadaghanan sa mga mayor sa nasangpit nga mga proyekto, taliwa nga mi-agi matud pa kini sa saktong proseso.
