BUTUAN CITY – Magpadala ang Germany og 13 ka mga sundalo ngadto sa Greenland isip kabahin sa reconnaissance mission uban sa ubang nasud sa Europa nga membro sa North Atlantic Treaty Organization kon NATO sama sa France, Canada, Sweden, ug The Netherlands.
Sumala sa German Defense Ministry, kini human mihangyo ang Denmark og pwersa hangtod Sabado aron susihon ang posible nga kontribusyon militar sama sa maritime surveillance human gipadayag ni U.S. President Donald Trump nga ang Greenland, usa ka autonomous nga teritoryo sa Denmark nga estratehikong nahimutang ug abunda sa mineral, importante kaayo sa seguridad sa U.S. ug gusto niya nga ang U.S. makapanag-iya niini aron malikayan nga masakop kini sa Russia o China.
Tungod niini, nagkagrabe ang tensyon tali sa Europa ug U.S. Samtang mas sayo pa niadtong Miyerkules, Sweden ug Norway nagpahibalo nga magpadala usab sila og military personnel sa isla.
