BUTUAN CITY – Gibulgar ni Batangas 1st District Rep Leandro Leviste nga ang tanang mga senador nga milangkob sa Kongreso ug nagplastar sa 2025 national budget, duna matud pa’y insertions.
Kini base na matud pa sa mga dokumentong gipasa ni anhing Department of Public Works and Highways kon DPWH Undersecretary Maria Catalia Cabral ngadto kaniya.
Nangayo og dispensa ang batan-ong kongresista ngadto sa mga senador apan iyang gibarugan nga duna siya’y kopya sa listahan sa iya mismong computer kansa magpamatuod sa maong alegasyon.
Bisan ang iya matud pang inahan nga si Senadora Loren Legarda, apil usab sa mga nagsingit og pundo sa 2025 national budget kondiin iya na kining gisulti ngadto sa iyang inahan kinsa mitubag lang kaniya nga wala matud pa kini kasayuran sa mga nakalista sa maong file.
Dugang pa sa kongresista, kumpara sa ubang mga senador, ang iyang inahan ang duna’y pinakagamay nga insertion base sa iyang gihuptang files.
Nagtuo si Congressman Leviste nga sa musunod nga mga adlaw, manggawas ra ang unod sa mga files nga gikan sa namatay nang si Cabral tungod kay dili lang siya ang duna niini nga mga dokumento.
