BUTUAN CITY – Gipahibalo ni Senador Risa Hontiveros nga andam na siya mudagan pagka-presidente sa 2028 national elections, apan kini mahitabo lamang kung ang opposition bloc mupili kaniya isip standard bearer.
Sa forum sa Foreign Correspondents Association of the Philippines, gibutyag ni Hontiveros nga naningkamot ang oposisyon nga maghi-usa tungod kay aduna matud pa sila’y tsansa nga makigbisog.
Gidugang pa niya nga nagsugod na sila og pakig-istorya sa nagkalain-laing grupo, apan kinahanglan nga ang tanan nga sakop adunay shared values ug dili lang pulitika ang basehan.
Kalabot usab sa posibilidad kung apil ang kampo ni Pangulong Bongbong Marcos sa united opposition, ilabina nga gilauman nga modagan usab si Vice President Sara Duterte, gipadayag ni Hontiveros nga kini magkinahanglan pa og daghang diskusyon tungod sa nagkalain-laing baruganan.
