BUTUAN CITY – Gipaneguro ni Jail Supt. Bernie Ruiz, asst regional director og tigpamaba sa Bureau of Jail Management and Penology kon BJMP-Caraga nga dili mahitabo dinhe sa rehiyon ang miulbo nga riot sa New Bilibid Prison nga gikamatay sa 9 ka mga piniriso.
Nasayran nga Sa eksklusibong pakighinabi ning sibyahan kang Jail Supt. Ruiz, gipadayag niining nagpatuman sila og hugot nga mga programa og palisiya alang sa seguridad sulod sa mga prisuhan ning rehiyon.
Lakip sa mga gipatuman ang Grey Hound Operation aron makuha ang mga kontrabando sulod sa prisuhan diin ang mga jail unit , gipasumbitar og report mahitungod sa pagkuha sa mga kontrabando lakip na ang hinang-giban.
Sumala pa sa opisyal nga lakip sa posibilidad nga makabaton og hinang-giban ang usa ka piniriso, mao ang pagpalusot sa mga dalaw og paghimo og diskarte sa bisan unsang makitang butang sama sa kutsara, toothbrush og lansang.
Gikumpirma usab sa opisyal nga muabot sa 14 ka jail facility ang sakop sa ahensiya sa tibook rehiyon sa Caraga.
Samtang gibutyag usab niini nga duna nay direktiba nga pwede nang magpadala og kumbiktadong piniriso ngadto sa Davao Penology basta duna lay pamatood nga wala natapte sa virus ang iturn-over nga piniriso.
