BUTUAN CITY – Pormal nang gipasakaan ug kaso ang duha ka mga suspetsadong riding-in-tandem nga responsable sa natigayong shooting incident kagahapong adlawa sa lungsod sa Cagwait, Surigao del Sur.
Sumala ni SPO3 Ordona sa Bayabas Municipal Police Station nga nakabase sa probinsya sa Surigao Del Sur sa eksklusibong pakighinabi ning sibyahan, nagpahigayon sila ug hot pursuit operation isip exit point batuk sa duha ka mga responsableng riding-in-tandem sa natigayong shooting incident sa lungsod sa Cagwait nga miresulta gilayon sa ilang pagkasikop.
Naila ang mga responsable nga sila Rondie Coquilla Malooy, 37-anyos, minyo ug residente sa may Cabugan Bag-ong lungsod ,Tandag City ug Roland Tampog Intas 25-anyos, ulitawo ug residente sa Libas-sud, San Miguel, Surigao Del Sur kinsa gika-ingong mga myembro sa Haring Bakal Group.
Nakompiska gikan sa mga suspetsado ang usa ka motorsiklo kolor itom nga wala’y plaka numero lakip na ang duha ka calibre .45 nga pistola nga duna’y duha ka magazine og tag-lima ka sulod nga buhing bala.
Sa kasamtangan, gi turnover na ang nasangpit nga mga suspetsado sa Cagwait PNP alang sa tukmang disposasyon samtang gisang-at na usab ang kaso pinaagi sa inquest proceedings sa Tandag City batok kanila. (Kris Maravilla)
