BUTUAN CITY – Bisan pa man nga klaro na sa nangaging mga pagdungog ug sa iyang mga public speeches, gipanghimakak gihapon ni Senator Risa Hontiveros ang mga alegasyong duna siya’y dapigan sa impeachment trial batuk kang Vice President Sara Duterte.
Gipadayag kini sa senadora human siya direktang gilakbitan ni VP Sara nga dapat usab siyang mag-inhibit isip senator-judge human ang mga panawagan nga kinahanglang mag-inhibit ang mga senador nga klarong pabor kaniya.
Sumala sa bise presidente, kung dili mu-apil sa impeachment trial ang mga senador nga pabor kaniya, kinahanglan usab nga mag-inhibit ang mga dili pabor kaniya sama kang Senadora Risa Hontiveros, kinsa dayag nga kontra sa pamilya-Duterte.
Human niini, gipadayag na ni Hontiveros nga himuon niyang matinud-anon ang iyang trabaho isip usa sa mga senator-judges sa impeachment court kondiin iya matud pang susihon og maayo ang matag-ebidensiya ug dili magpadala sa komento sa pipila nga batuk kang VP Sara.
Gi-awhag usab niini si Vice President Duterte nga tubagon lang og insakto ang mga summons nga gikan sa senado ug ipasabot ang mga akusasyon batuk kaniya.
