BUTUAN CITY – Karon nang alas-otso sa buntag sugdan sa Agusan del Sur Provincial Health Office ang ilang ‘Resbakuna’ aron matupok gilayon ngadto sa ilang mga healthcare frontliners ang 416 ka mga doses sa Sinovac vaccine nga nangabot kagahapong adlawa.
Sa eksklusibong pakighinabi sa Bombo Radyo Butuan, gipadayag ni provincial government spokesman Alfredo ‘Nonoc’ Plaza nga simultaneous kining himuon sa may DO Plaza Memorial Hospital ug San Francisco Doctor’s Hospital samtang gipasahan usab og pipila ka doses ang mga ospital sa mga lungsod sa Bunawan ug Talacogon.
Pinaagi matud pa niini, mas madugangan ang kumpyansa sa mga frontliners paghimo sa ilang trabaho nga mao ang pag-atiman sa mga COVID-19 patients.
Gila-uman usab sa opisyal nga higayong matupukan na sa Sinovac vaccines ang ilang mga frontliners, maka-uli na ang uban kanila kinsa mas gipiling dili una mu-uli aron ang masigurong dili mataptan og COVID-19 ang ilang pamilya nga posibleng ilang makuha gikan sa mga pasyenteng ilang gipang-atiman.
Gidugang ni Plaza nga ang 416-doses, mao pa lang ang unang gihatud gikan sa kapin 800-doses nga gigahin sa nasudnong kagamhanan alang sa ilang lalawigan.
Sigon sa opisyal, sa pag-abot pa lang sa Sinovac vaccine gikan sa China, naghimo na sila og screening atol sa ilang gihimong simulation alang na unya sa vaccination roll out. Gani, andam na usab ang mga COVID-19 teams sa ilang mga ospital higayong duna’y matupukan nga magpakita og adverse effect.
