BUTUAN CITY – Nakurat ang katawhan sa Dinagat Islands province nga nagkatapok alang sa gipahigayong “Himamat 2025” nga gi-organisa sa Commission on Elections kon COMELEC provincial office human sa gihimong mic drop dayong walkout ni Representative Allan Uno Ecleo, ang kasamtangan nga kongresista sa maong probinsya.
Makita sa video nga ning-viral online nga hapsay pa ang dagan sa paghatag sa maong kongresista sa iyang pamahayag sa unang mga minuto samtang anaa kini sa entablado.
Apan dihang ningtingog na ang moderator sa maong programa aron kini pasalamatan bisan kon wala pa siya mahuman sa iyahang pamulong dihang na-abtan sa pagtingog sa timer nga anaa sa display sa likod niini, kalit lang gibundak sa maong kongresista ang microphone sa salog, dayon walkout sa venue.
Tungod niini, napugos ang team sa maong opisyal paghikling bisan kon wala pa nahuman ang programa, dayong anunsyo nga duna matud pay appointment ang kongresista ug gikinahanglan na kining magdali.
Una nang nakadawat og mga pagpang-bash ang maong kongresista ning nakalabayng adlaw human kini ningpirma sa pagpa-impeach kang Bise Presidente Sara Duterte.
