BUTUAN CITY – Nagpatabang na sa National Bureau of Investigation kon NBI si Surigao del Norte 2nd District Rep. Robert Ace Barbers aron imbestigahan ug patubagon sa balaud ang mga vloggers nga nagpakaylap og sayop nga impormasyon ingon man pagdaut sa House Quad Committee.
Sigon ni Barbers, dili nila santohon ug palabyon ang mga vloggers nga gitu-is matud pa ang kamatu-uran nga mihimo pa og mga bakak ug gipang-post sa You Tube, Tiktok ug uban pang social media platforms.
Nagduda si Barbers nga gipundohan matud pa sa mga Philippine Offshore Gaming Operations kon POGOs ug sa mga sindikato sa ilegal nga droga ang mga malisyoso ug mangwartahay matud pa nga mga vloggers. Sigon ni Barbers, misulat na siya kang NBI Chief Atty. Jaime Santiago aron tumbukon ang mga vloggers nga nagpakaylap og sayiop nga mga impormasyon nga miguba matud pa sa integridad sa public service ug milingla sa publiko aron balihon matud pa ang kamatu-uran.
Nagsubmite na usab si Barbers sa NBI og pipila ka mga ebidensya sa mga malisyosong vlogs apil na niini ang mga deregatory vlogs gikan sa ilang lalawigan ug gipakayap sa Manila-based mercenary vloggers nga midamay kaniya ug sa iyang igsoong si Surigao del Norte Gov. Lyndon Barbers diha sa operasyon sa illegal nga droga.
