BUTUAN CITY – Usa ka semana human mipirma sa petisyon alang sa pagpa-impeach kang Vice President Sara Duterte, mibu-ak na sa iyang pagpakahilom si Deputy Speaker ug Cebu 5th District Rep. Duke Frasco kondiin iyang gidepensahan ang iyang desisyon pag-uban sa 240 ka mga magbabalaud nga mibotar sa maong lakang niadtong Pebrero 5
Sa iyang pagpamulong kagahapon, Pebrero 11 atol sa serbisyo caravan sa iyang lungsod nga natawhan sa Liloan, gipadayag niini nga mabutang sa risgo ang mga proyekto ug mga programa sa ilang distrito kung dili siya mu-uban sa panon.
“Ni sign ko sa impeachment tungod ninyo. Tungod sa atong mga programa, proyekto, kalambuan. Di nako marisgo atong mga programa, mga proyekto sa lungsod sa Liloan kung di ko mukuyog sa kadaghanan.”
Apil matud pa niini ang mga scholarships alang sa 16,000 ka mga estudyante sa ilang distrito apil na ang financial assistance alang sa mga persons with disabilities (PWDs), senior citizens ug mga solo parents, ingon man ang budget alang sa mga big-ticket infrastructure projects sama sa Camotes Airport.
Gibarugan pa ni Frasco kung dili matud pa siya mu-uban sa kadaghanan, ilang matagamtaman ang ‘zero budget’ sa iyang buhatan ug sa kinatibuk-ang 5th district.
“Ma zerohan ta sa kaayohan sa mga programa ug mga proyekto sa atong distrito,” dugang pa niya.
