BUTUAN CITY – Positibo si Congressman Prospero ‘Butch’ Petchay sa Surigao Del Sur nga ma-aprubahan sa himoong joint session karong adlawa sa House of Representatives ug Senado ang hangyu ni Pangulong Rodrigo Duterte nga lugwayana hangtud sa Disyembre 31 ning tuiag ang pagpatuman sa martial law sa tibook Mindanao tungod matud pa sa super majority.
Mobotar si Congressman Pitchay pabor sa maong extension dungan sa pagbutyag nga walay rason nga babagan ang hangyung lugway sa balaod militar tungod kay wala man sila’y nakitang paglapas sa tawhanong katungod sa mga nagpatuman sa martial law.
Dugang pa sa opisyal, bisan matud pa ug matapos na ang giyera sa Marawi City, duna pa gihapo’y mga kagubot sa Mindanao sama nalang sa pagpang-harass sa rebeldeng New People’s Army kon NPA.
Gipadayag pa niini nga kung daotan pa ang martial law, nganung gibutang man sa batakang balaod nga dunay katungod ang Presidente sa pagdeklara niini basta aduna lay rebelyon ug pagpanakop.
Gipahayag usab sa Kongresista nga lahi nga klase sa away ang gi-atubang karun sa gobyerno tungod sa pagpamatay sa terorista sa mga sibilyan.
Gibutyag usab sa magbabalaod nga dugay nang plano sa teroristang Maute group nga magtukod ug islamic republic sa Mindanao. (Rolan Janea)
