BUTUAN CITY- Gipanghinambog ni House Deputy Minority Leader ug ML Partylist Rep. Leila de Lima nga ang ikatulong impeachment complaint batok kang Vice President Sara Duterte usa ka “mas gipalig-on” nga bersyon sa mga artikulo nga kaniadto gisumite sa Senado sa miaging Kongreso.
Sumala ni De Lima, nga iyang giduso ang reklamo human sa hugot nga pag-review sa unod ug mga ebidensya, lakip na ang mga video sa giingong hulga batok nila President Ferdinand Marcos Jr., First Lady Liza Araneta Marcos ug kanhi Speaker Martin Romualdez, audit findings, liquidation vouchers, legislative records, ug sinumpaang salaysay nga adunay kalabotan sa giingong pag-abuso sa confidential funds sa Office of the Vice President kon OVP ug Department of Education kon DepEd.
Gipahibalo usab niini ang proseso sa Kamara nga moagi sa transmittal gikan sa Office of the Secretary General, pagbutang sa Order of Business, paghisgot sa Rules Committee, hangtod sa pag-refer sa House Committee on Justice.
Gipaila usab ni Atty. Amando Ligutan, abogado sa mga complainant, ang grupo nga gimugna sa mga pari, pastor, madre ug civil society members kansa ming-insistar nga ang impeachment dili lamang usa ka isyu sa konstitusyon kondili usa usab ka moral nga panawagan, aron hatagan og higayon ang Bise Presidente nga motubag sa mga alegasyon ug ipresentar ang ebidensya sa duha ka kampo.
Samtang, dugang pa ni Father Joselito Sarabia, usa sa pari nga complainant, nga dili lang kini kalabot sa hisgutanang legal kundi lakip na usab ang moral nga obligasyon aron nga patubagon ang mga opisyal sa gobyerno. Sigon ni Fr. Sarabia, nga dalan usab matud pa kini aron nga maka-explain ang Bise Presidente, butang nga wala nabuhat niini sukad pa kani-adto. Gila-oman usab nga mapadala gilayon kini sa House Secretary General ngadto sa Office of the Speaker aron nga malakip sa pagahisgutan sa Kamara, subay sa mandato.
