BUTUAN CITY – Gi-inspeksyon na sa composite team sa lima ka mga hingtungang buhatan sa lokal nga kagamhanan ning siyudad sa Butuan ang Sentro Poultry Farm sa Brgy. Los Angeles nga gireklamo sa mga residente sa Purok 5 tungod sa pagpasagad matud pa sa operasyon niini hinungdan sa natigayong fly infestation ug pagbuga sa dili masingo nga baho gikan sa ilang mga waste materials.
Sa eksklusibong pakighinabi sa Bombo Radyo Butuan, gibutyag ni Jess Ivan Saburao sa City Environment and Natural Resources Office kon City ENRO nga ang ilang pag-aksyon gihimo human nila nadawat ang reklamo niadtong Hunyo 16 nga gipa-abot ngadto sa Butuan City Information Office ug maoy gihatag ngadto kanila rason nga gi-aksyunan gilayon kini niadtong Hunyo 20.
Apil sa mihimo sa inspeksyon ang mga personahe sa City Health Office, City ENRO, City Health Office, City Agriculture’s Office ug City Veterinary Office.
Gipadayag sa opisyal nga aron malikayan ang ingon nga problema, kinahanglang tutukan sa mga poultry farms ang pagmintina sa health sanitation sama sa kahinlo sa palibot ug saktong maintenance ilabina nga dugukon kini sa mga langaw nga proyekto.
Sa pagkakaron, gihulatan na lang nila ang resulta sa inspeksyon adiser maka-aksyon ang Butuan City government.
Sa mga ingon niini nga problema, ang kasagaran nilang aksyon mao ang pag-isyu og cease and desist order kon CDO nga sundan gilayon sa pag-revoke sa permit kung padayong magmagahi ang management sa manukan.
Sa pagkakron, ila nang gi-review ang mga clearances ug permit sa maong manukan aron masuta kung ila bang nasunod ang mga probisyong nakalatid sa mga niini.
