BUTUAN CITY – Dakong tanghaga alang kang kanhi Butuan City Mayor Ferdinand Amante Jr., ang indibidwal nga mipasaka og kaso ngadto sa Ombudsman tungod sa pagkasunog sa Novo Jeans and Shirts Enterprises niadtong tuig 2012 nga mikalas og 17 ka mga empleyado.
Kini ang reaksyon sa kanhi mayor sa eksklusibong pakighinabi sa Bombo Radyo Butuan isip reaksyon sa maong reklamo kondiin nakitaan usab og probable cause sa Ombudsman hinungdan nga girekomenda niini ang pagpasaka na kaniya og usa ka ihap sa kasong graft.
Apil sa gikasuhan sila Licensing Officer IV Paul Cabrera og Acting City Fire Marshal Alric Gomez. Nagsumikad kini sa pag-isyu og business permit sa lokal nga kagamhanan taliwa nga wala matud pa makapasar sa fire safety inspection ang maong establisamiento.
Sigon ni Amante, katingalahan ang timing sa pagsang-at sa reklamo tungod kay gihimo kini atol sa campaign period ning mi-aging tuig kansa upat ka tuig na ang nakalabay human natigayon ang sunog sa Novo niadtong Mayo 2012.
Ang mas gikatingala niya tungod kay ang mipasaka og kaso ngadto sa Ombudsman, usa man ka pulitiko nga gikan sa Marinduque kinsa wala’y kawsa o kaha interest sa mga panghitabo sa Butuan.
Mas gikatingala usab niya ang grabeng propaganda ang gigamit human nga nanggawas kini nga balita dili lang sa radyo apan apil na sa mga nasudnong TV networks ingon man nasudnong mantalaan.
Kini pamatuod matud pa nga duna’y impluwensyadong indibidwal nga nagpaluyo niini. (Beth Ruiz)
