BUTUAN CITY-Ipatuman na sugod karung adlawa Huwebes, Hulyo 22, ang bag-ohay lang gipagawas nga kamanduan gikan sa provincial government sa Agusan del Norte nga nagtumong pagmontar og balik sa regional border control point kon checkpoint boundary tali sa Misamis Oriental ug Caraga Region aron mapugngan ang pagkuyanap sa mas makatakod nga Delta variant sa COVID-19 nga anaa na sa Gingoog City sa Misamis Oriental.
Sa eksklusibong pakighinabi sa Bombo RAdyo Butuan, gibutyag ni Aguan del Norte police provincial director PCol. Martin Gamba nga kini ang nauyunan sa mga membro sa Caraga Regional Task Force for COVID-19-One Caraga Shield (RTF-COCS) atol sa ilang teleconference kagahapong adlawa.
Madumdumang nagpagawas na og executive order si Gov. Dale Corvera nga mag-require og Health Certificate o Exit Pass ang tanang mga biyahidor o mga pasaherong gikan sa Region 10 nga mosulod sa probinsya aron makontrola ug mapugngan ang pagsulod sa maong Delta variant sa probinsya.
Lakip sa ipatuman ang pagdili sa mga Caraganons sa pagsuroy-suroy sa mga lugar nga duna na’y Delta variant ug ilalom sa Enhance Community Quarantine (ECQ) gawas lamang sa mga essential nga lakaw ug adunay mga emerhensiya.
Apan ang mga dili Caraganaons nga gustong musulod ning rehiyon ilabina kadtong gikan sa mga lugar nga nakatala na sa nasangpit nga variant sama sa Region 10 partikular sa Cagayan de Oro ingon man Gingoog City, kinahanglan nga magpresenta sila sa mga gikinahanglang rekisitos sama sa negatibong resulta sa RT-PCR test; Vaccination Card tali sa 1st o 2nd dose gikan sa 2 week period sa pagpabakuna; samtang alang sa APOR – kinahanglan magpresenta og company ID ug Travel Authority; alang usab sa mga Frontline medical services kinahanglan dunay ID; ingon man Application nga S Pass ug Stay safe pass; Delivery receipt o Mayor’s permit alang sa mga transportasyon nga adunay dala nga essential goods services; ug lakip na sa pagdala og ID
Alang usab sa mga lumolupyo sa Magsaysay, Misamis Oriental, ID nga adunay nakabutang nga address niini ang mamahimong ipakita.
Kini usa ka konsiderasyon sa gobernador tungod kay duol raman sila sa lungsod sa Carmen diin didto sila mag merkado.
Apan alang sa gastuhonon sa regional border, boluntaryong mudonar ang matag probinsyal ug city LGU og tag Php50,000.
