BUTUAN CITY – Gisugdan na sa Dinagat Islands provincial government ang ilang recovery and rehabilitation efforts, halos usa ka buwan human ang pagkuso-kuso sa bagyong Odette sa ilang lalawigan.
Sigon ni provincial government spokesperson Jeff Crisostomo, subling gi-organisa ni Gov. Arlene ‘Kaka’ Bag-ao ang ilang lokal nga kagamhanan ngadto sa tulo ka mga clusters, ang emergency operations, recovery, ug governance aron aksyunan na ang ilang mga plano.
Sigon ni Crisostomo, ang ilang emergency operations center magpadayon pagpanghatag og relief ug health services, samtang ang recovery group masugod na paghimo og mga plano ug mga programa nga gitumong sa subling pagpabarog sa public infrastructure ug pagbalik sa panginabuhian.
Padayon gihapon ang pagpalig-on sa ilang community kjitchen aron duna gihapo’y makaon ang mga tawo samtang nagkamulo pagpabarog sa ilang kabalayan.
Dugang pa ni Crisostomo, kabahin usab sa ilang rehabilitation program ang paglusad og mga dayalogo diha sa mga barangays alang sa housing ug zoning matters.
Kini tungod kay ang ilang recovery dili lang kalabot sa subling pagpabarog sa ilang kabalayan kondili apil sa pagseguro sa ilang lokasyon, access ug mga epekto diha sa panginabuhian ug palibot. Apil sa recovery programs ang reconstruction sa nangadamyos nga kabalayan sa luwas nga mga lugar ingon man resettlement sa mga pamilya nga makapalayo na sa mga danger zones.
Samtang ang governance cluster, magpadayon sa ilang administrative ug budgetary functions sa provincial government.
