BUTUAN CITY – Na-ilhan na ang rebeldeng New People’s Army kon NPA nga napatay sa engkwentro tali kanila ug sa mga sundalo pasado alas-dose ning mi-aging tunghang gabii sa Brgy. De Oro ning siyudad sa Butuan.
Una nang gibutyag ni Lt. Jade Bryce Buñe, ang Civil Military Operations kon CMO officer sa 29th Infantry ‘Matatag’ Battalion, Philippine Army, nga gawas sa maong rebeldeng New People’s Army, narekober usab ang usa ka AK-47 rifle uban sa magazine, mga bala ug usa ka backpack, human ang unom na ka sunod-sunod nilang engkwentro nga nagsugod niadtong Agusto 19 sa Brgy. Salvacion ning siyudad nga gisundan sa may Brgy. Sta. Maria ingon man sa Brgy. Tabon-Tabon sa lungsod sa Sibagat, Agusan del Sur.
Naila ang namatay nga si Aldo Gano alias Tulong, residente sa Sto Nino, Bayugan City), Agusan del Sur.
Gibutyag sa opisyal nga ilang gisundan-sundan ang maong grupo human nakadawat og impormasyon nga anaa matud pa sa maong grupo ang secretary sa Northeastern Mindanao Regional Committee nga si Myrna Solarte kinsa mas naila sa bansag nga Ka Maria Malaya.
