BUTUAN CITY – Anaa karon sa status quo ang posisyon sa upat ka mga opisyales sa managlahing buhatan sa Land Transportation Office kon LTO-Caraga nga mikwestyon sa re-assignment nga gipagawas ni DOTr Assistant Secretary Galvante subay sa ilang gibarugang petisyon ngadto sa Civil Service Commission kon CSC-Caraga nga wala matud pa’y hurisdiksyon sa ilang assignment ang LTO-Central Office.
Kini may kalabutan na sa una nang gipasibaw nga concern sa maong rehiyunal nga buhatan batuk sa maong mga opisyal kinsa wala misunod sa nasangpit nga re-assignment order.
Sa eksklusibong pakighinabi sa Bombo Radyo Butuan, gipadayag ni DOTr-Caraga acting chief Danilo Borja nga ang final assignment unya sa nasangpit nga mga opisyal, matuldukan ra higayong magpagawas na og resolusyon kalabot niini ang CSC-Central Office nga i-channel usab ngadto sa LTO-Central Office kansa mao na unya’y magpagawas og bag-ong kamanduan sa ilang rehiyunal nga buhatan.
Samtang gahulat sa hukom sa CSC-Central Office, at ease una sa ilang trabaho ang nasangpit nga mga hingtungdang opisyal samtang ang mga na-assign sa laing posisyon ug wala misupak sa re-assignment order, magpabilin gihapon sa ilang kasamtangang pwesto.
