BUTUAN CITY – Susihon na sa Business Permits and Licensing Division kon BPLD sa Butuan City government ang nabulgar nga ‘Rapid Test Negative Result for Sale’ nga modus matud pa sa may Bancasi Airport bugti sa bayad nga 1,500-pesos.
Madumdumang gibulgar eksklusibo lang dinhi sa Bombo Radyo Butuan sa Agusanong si Marlon Fortun ang maong modus dihang siya mismo ang nakasinati niini dihang pa-uli na sa kauluhang Manila human na-abtan og lockdown sulod sa lima ka mga buwan.
Iyang gibutyag nga ang nakapa-it tungod kay wala siya kuhai og blood sample aron gamiton sa rapid test apan gihatagan na og negative result sa gipa-ilawmang rapid test.
Kini iya usab ng nasaksihan sa lain pang unom niya ka mga nakasakay kinsa wala na’y laing choice kondili mubayad na lang aron dili na malangay sa ilang biyahe.
Samtang sa eksklusibong pakighinabi sa Bombo Radyo Butuan, gipadayag ni Michiko de Jesus, tigpamaba sa Butuan City government nga ang Department of Health lang ang duna’y kagahom pagmontar og highly-regulated laboratories o testing center nga dili lang basta-basta buksan ni bisan kinsa ilabina kung wala’y accreditation gikan sa maong ahensya.
Alayon niini, gipanawagan sa opisyal ang nag-expose sa maong isyu nga magduso og formal complaint apil na ang iyang mga ebidensya aron ila gilayon kining ma-aksyunan.
