BUTUAN CITY – Hugot ang monitoring nga gihimo sa Office of the Civil Defense kon OCD-Caraga sa mga gibiling damyos og posibleng dugang mga injuries human ang kusog nga linog.
Gibutyag ni Amado Posas – tigpamaba sa maong buhatan, nakig-alayon na sila sa nagkada-iyang local government units sa Surigao del Sur ilabina sa mga lungsod sa Lanuza, Carrascal, Madrid, og Cortes.
Kini aron ma-validate ang mga inisyal nga reports nga ilang nadawat kalabot sa mga damyos nga gibilin niini sama sa porsyon sa simbahan sa lungsod sa Carmen nga nadamyos.
Padayon usab matud pa ang gihimong rapid damage assessment sa nagkada-iyang lungsod aron maklaro ang maong mga damyos.
Samtang unom ka mga sakyanan nga gigarahe sa daang terminal sa lungsod sa Madrid ang nadat-ugan sa nahugnong atop atol sa pagtay-og sa kusog nga linog kaganinang kaadlawon.
Apil sa nadat-ugan ang duha ka mga fire trucks sa Bureau of Fire Protection, tulo ka mga sakyanan sa iyang ka-ubanang nga pulis og usa ka motorized trisicad sa usa ka sibiliyan.
Sa eksklusibong pakighinabi ning sibyahan, gibutyag ni PLt. WilsonJuanite, hepe sa Madrid Municipal Police Station, nga subject for demolition na ang maong terminal kansa temporaryong gihimong garahe sa ilang mga sakyanan apil na sa fire trucks sa Bureau of Fire Protection.
Hinuon dili dakong damyos ang mugna niini.
