BUTUAN CITY – Naglusad na og rapid damage assessment ang Department of Social Welfare and Development kon DSWD-Caraga uban sa Office of the Civil Defense kon OCD-Caraga ug ang lokal nga kagamhanan sa Mainit, Surigao del Norte sa Brgy. Siana, ang dapit diin natigayon ang mudslide tungod sa pagbigay na sa tailings storage facility kon TSF-3 sa mining company nga Greenstone Resources Corporation kon GRC.
Sa eksklusibong pakighinabi ning sibyahan, gibutyag ni Marko Davey Reyes, tigpamaba sa DSWD-Caraga, ilang natumbok nga mi-abot sa 266 ka mga pamilya ang nanghikling sa nagkada-iyang evacuation centers samtang mi-abot lang sa 25 ka mga balay ang nadamyos.
Kini samtang gibisita na usab sa mga opisyal sa National Disaster Risk Reduction and Management Council kon NDRRMC ang maong lugar.
Sigon ni reyes, ang tanan nahatagan na matud pa nila og tag-tulo ka mga family food packs matag-pamilya gawas pa sa mga non-food items sama sa kitchen kit, hygiene kit, sleeping kit ug family kit.
Padayon usab ang ilang pakig-alayon sa local government aron masuta ang nag-unang panginahanglanon nga kinahanglan nilang unaon paghatag.
