BUTUAN CITY – Gitawag og bulok ni kanhi Surigao del Norte 2nd District Rep Robert ‘Ace’ Barbers, ang mga tawong nagkapa-aron ingnon matud pa nga engineer kinsa misaway nga gigamitan og concrete epoxy ang mga liki sa wala pa mahuman nga konstruksyon sa Poctoy-Bonifacio Bridge sa Surigao City.
Sa iyang pag-atubang sa mga tigbalita, wala mapugngi sa kanhi magbabalaud ang iyang ka-ulit sa mga nabasa nga comments sa mga netizens nga misaway sa maong klase sa pagtapak sa maong mga liki.
Gibutyag niini nga moderno na karon ang mga gamit construction materials ug apil na matud pa niini ang concrete epoxy nga maoy gamiton sa mga ingon niini nga liki sa semento.
Gika-ulit usab niya ang gipasi-atab nga usa ka dangaw ang gintang sa maong liki dayong pasangil nga ang mga supporters matud pa sa ilang mga ka-atbang sa pulitika sa Siargao Islands ang nagpakaylap niini.
Human og tira sa iyang mga bashers, gikwestyon usab ni Barbers nga wala matud pa siya’y kalabutan kung duna’y liki sa maong proyekto ilabina nga gipasabot na sa contractor engineer nga hairline cracks lang kini kansa normal matud pa nga mahitabo sa mga semento.
