BUTUAN CITY – Gi-terminate na sa Metro San Fernando Water District (MSFWD) sa Pampanga, ang ilang Joint Venture Agreement (JVA) tali sa PrimeWater tungod sa kapakyas niini pagpatuman sa mga commitments apan, gitugutan gihapon kini sa korte nga magpadayon sa ilang operasyon.
Kini human gimando ni Pangulong Ferdinand Marcos Jr. ang imbestigasyon sa PrimeWater human sa daghang reklamong mitumaw sa tibuok nasud kondiin nasuta nga apektado sa ilang dili maayong serbisyo ang 16 milyunes ka mga konsumidor.
Madumdumang migawas sa findings sa Commission on Audit kon COA nga nga wala na-invest ang PrimeWater sa ilang gisaad nga capital expenditure ug nasuta nga daghan pang mga lugar ang nagreklamo tungod sa ilang lubog kaayong tubig, ubos nga pressure, kanunay pa ang mga water interruptions ug kulang nga delivery sa water supply.
Ang issue sa PrimeWater dili lang pang-local kondiin national concern na usab ilabina nga daghan ang nagduda sa legalidad sa ilang mga deals ug sa kapatas sa revenue sharing. Ang uban nga LGUs nagkonsidera na og pag-cancel sa ilang mga JVAs.
