BUTUAN CITY – Target ni Pinay ace netter Alex Eala nga mapadayon ang pagratsada niini sa 2026 BNP Paribas Open nga himoon sa Indian Wells Tennis Garden sa California diin target niini ang tiket sa quarterfinals.
Atubangon ni Eala si world No. 14 nga si Linda Noskova sa Czech Republic alas-11 sa buntag (oras sa Maynila), diin ang modaog makaabante sa Round of 16 sa maong WTA 1000 tournament.
Dugay nang magkaribal sila Eala ug Noskova. Nagsugod ang ilang panagsangka sa dihang mga junior pa sila. Napildi ni Eala si Noskova sa quarterfinals sa French Open niadtong 2020 sa iskor nga 4-6, 6-3, 6-2.
Apan dako na kaayo ang kausaban ni Noskova sukad niadto. Mas lawom na ang iyang kasinatian. Nakadaog siya sa WTA 500 Monterrey Open niadtong 2024.
Kanunay na usab makita si Noskova sa mga Grand Slam events. Ang pinakataas niyang nahumanan mao ang quarterfinals sa Australian Open niadtong 2024, samtang nakaabot siya sa fourth round sa Wimbledon 2025, third round sa US Open 2025, ug second round sa French Open niadtong 2023 ug 2024.
Bisan pa niana, andam si Eala. Naanad na siya sa pag-atubang og mga kusgan nga karibal kay nakapildi na siya og pipila ka Top 10 players, lakip na ang reigning Wimbledon champion nga si Iga Swiatek sa Miami Open niadtong miaging tuig.
Gituonan na sa kampo ni Eala ang estilo sa dula ni Noskova.
Nakasulod si Eala sa fourth round human miretiro sa duwa ang world No. 4 nga si Coco Gauff sa Amerika.
Sa pikas bahin, gipildi ni Noskova si Sorana Cirstea sa Romania sa Round of 32 pinaagi sa iskor nga 6-7 (5), 6-4, 6-4.
