BUTUAN CITY – Giklaro ni Senadora Cynthia Villar, nga bisan og usa siya sa 22 ka mga Senador nga ningperma aron temporaryong ipahunong una ang gipatumang PUV Modernization program, pabor gihapon kining ipatuman kini. Sumala sa Senadora, tumong sa iyang pagpirma nga mahatagan una og pagtagad ang mga isyu sa nasangpit nga programa. Dungan niini, iyang giklaro nga dako gihapon ang iyang pagsalig sa modernization program sa kagamhanan.
Samtang gibutyag usab ni Senador JV Ejercito nga hangtud karon, gubot pa gihapon ang consolidation sa mga ruta. Yawe matud pa ang financing scheme aron magmalampuson ang nasangpit nga programa Gipamugos niini nga dili gayud makaya sa mga jeepney drivers ang mga modernong Jeepney kansa nagkantidad sa 2.8 million pesos dayong hupay sa kabalaka sa mga drivers nga naka-consolidate na sa ilang prangkisa.
Sumala usab ni Senador Joel Villanueva, mismong ang mga opisyal na sa Land Bank of the Philippine ug sa Development Bank of the Philippines ang nagbutyag nga mahal ra kaayo ang modern jeepney nga gi-asdang sa pangamhanan nga naka-apekto og dako sa mga gagmay’ng drivers ug transport operators.
