BUTUAN CITY – Nanawagan si Most Reverend Cosme Damian Racines Almedilla, obispo sa Diocese of Butuan, ngadto sa tanang katawhan nga mulambigit sa National Day of Prayer and Public Repentance nga himuon matag-adlaw’ng Dominggo kansa nagsugod nga gihimo sa tibuok nasud niadtong Oktubre 7, dungan sa Feast of Our Lady of the Holy Rosary.
Giklaro ni Bishop Almedilla nga ang maong kalihukan tungod kay nasudnon, kinahanglang sanungon dili lang sa mga taga-simbahan kondili sa tanang katawhan sa Pilipinas nga mag-ampo ug maghinulsol sa mga salang nahimo hinungdan nga mitumaw ang garapalang kurapsyon.
Dinhi gi-awhag ni Bishop Almadilla ang mga Parokya, kapilya, eskwelahan, panimalay ug mga pamulya nga maghiusa sa pag-ampo alang sa kalinaw, katarungan, ug kaayohan sa nasud.
Dungan niini ang pagsuot usab og kolor puti matag-Dominggo, o kaha magbutang og kolor puti nga ribbon o bisan unsa diha sa side mirror sa sakyanan, sa gate sa balay, gawas sa balay, sa trabahuan ug sa dalan timaan sa pagkondena sa katawhan sa lapad nga kurapsyong natigayon karon sulod sa atong gobyerno.
Nanawagan usab siya sa kabatan-unan nga pangunahan ang maong kalihukan tungod kay alang man kini sa ilang kaayuhan ilabina sa ilang kaugmaon.
Wala matud pa kini magpasabot nga mu-asdang diha sa kusganong pakigbisog kondili diha sa pag-ampo tungod kay mao kini ang panawagan sa atong Kahitas-an.
