BUTUAN CITY – Gideklarang persona non-grata sa probinsya sa Dinagat Islands ang 33-anyos nga si drag artist Amadeus Fernando Pagente kon mas nailang “Pura Luka Vega”, residente sa Dipolog City, Zamboanga Del Norte.
Kini human gi-aprobahan ang Sangguniang Panlalawigan Resolution No. BBE-3627 nga gipangamahanan ni District 2 Board member Regivvi Amor Alcaria.
Nakalatid sa resolusyon nga dili tugutan si Vega nga makasulod ug makapahigayon og bisan unsang transaksyon sa Dinagat Islands province.
Kini tungod sa kontrobersiyal nga local bar performance kondiin iyang gi-remix ang Katolikong kantang “Amahan Namo” niadtong Hulyo 9 samtang suot ang Jesus Black Nazarene inspired attire.
Una nang gideklarang persona non Grata ang nasangpit nga drag queen sa Metro Manila, Laguna, Cagayan de Oro City, Bukidnon, General Santos City, ug uban pa.
Gawas sa pagdeklara kaniya nga persona non grata, patung-patong nga kaso usab ang gi-atubang niini tungod sa paglapas niya sa Article 201 sa Revised Penal Code.
