BUTUAN CITY – Gibuksan pinaagi sa puno nga style nga talan-awon ang 2024 Olympics sa Paris uban sa libu-ang mga atletang naglawig sa River Seine samtang gilabyan ang mga performers nga anaa sa mga tulay, kilid sa suba ug mga rooftops alang sa ambisyusong senaryo sa opening ceremony.
Gibaylo ang usa ka stadium sa waterway alang sa unang higayon nga pag-abli sa ‘greatest show on earth’, ang dul-an upat ka oras nga talan-awon, gitapos nila French judo great Teddy Riner ug sprinter Marie-Jose Perec pinaagi sa pagpasiga sa hot air balloon nga porma og cauldron kansa gipakayab sa kawanangan sa Paris.
![](https://img.bomboradyo.com/butuan/2024/07/download-3.webp)
Mipatigbabaw ang kolor pula, puti ug blue nga mga fireworks sa Tricolore ibabaw sa Austerlitz Bridge atubangan sa 6,800 ka mga atletang gikan sa 205 ka mga delegasyon nga naglaawig sakay sa 85 ka mga bangka ug mga barges agi sa pipila ka mga sikat nga landmarks sa Paris.
Duna’y mga surprise performances sa kinatibuk-ang seremonya apil na ang usa ka cabaret number gikan kang American singer-songwriter Lady Gaga, ingon man ang emosyunal nga pagbalik ni Canadian icon Celine Dion.
![](https://img.bomboradyo.com/butuan/2024/07/celine3.jpg)