BUTUAN CITY – Padayon pang giproseso sa lokal nga kagamhanan ning dakbayan sa Butuan ang pag-download og pundo aron masuportahan ang mga atleta sa Department of Education kon DepEd- Butuan City division nga musalmot sa Caraga Regional Athletic Games kon CaraGames 2025.
Sigon ni Rosalito Libres, ang Butuan City Education chief, ning mi-aging semana, nagtagbo ang Local School Board ug ilang nasabutan nga ihatag karong semanaha ang gikinahanglang pundo sa dibisyon pinaagi sa Special Education Fund.
Ang pundo matud pa nga gipangayo sa dibisyon naglakip na sa ilang gikinahanglang pundo alang sa pagpangandam sa Palarong Pambansa 2026 mu-abot sa 7-milyunes pisos nga aprubado na ni Mayor Ronnie Vicente Lagnada.
Apil matud pa sa punduhan sa Local School Board ang pag-isyu og specialized uniform alang sa mga atleta ning siyudad nga karon pa lang gihimo sa city government.
Ang pundo sa maong uniform, dugang lang sa pundo usab nga gitagana sa schools division alang sa susamang katuyuan. Gani bisan ang mga school parents-teachers associations sa mga tunghaan, duna usa’y abag sa maong concern rason nga dili matud pa kini angayang kabalak-an.
