BUTUAN CITY – Tumang pagpasalamat ang nabungat sa 19 ka mga pasahero sa usa ka pumpboat human kini nabuslot dihang na-igo sa batuhong bahin sa Busong-busong River nga gisubayan niini sa Surigao City kagahapon tungod sa mga dagkong balud nga hatud sa low pressure area.
Sigon sa asuy sa usa sa mga pasahero nga si Mark Victor Segador, usa ka magtutudlo, padulong na unta siya sa Brgy. Cagutsan aron mangandam alang sa pagbukas na unta sa klase karong adlawa ka-uban ang ubang mga pasahero.
Dihang nagsubay na matud pa sila sa suba karga ang mga gamit sa eskwelahan sama sa mga libro, mga sinakong bugas og uban pa, mi-agi ang dakong lantsa nga LQP nga nakapasamot sa pagdagko sa balud hinungdan sa ilang pagkapadpad ngadto sa batuhong bahin nga miresulta sa pagkabuslot niini.
Nasusama matud pa barkong Titanic ang nadangatan sa ilang gisakyang pumpboat tungod kay inanay kining mitikla-ob tungod sa misulod nga tubig hinungdan sa paglumba nila og lukso sa mab aw nga bahin sa suba diin gidala sa operator ang maong sakyanan rason nga wala’y bisan usa kanila ang nakalas.
Bisan nangabasa na ang ilang mga gikargang butang sama sa libro og mga food supplies, wala nila kini igsapayan tungod kay mas mahinungdanon man ang ilang kaluwasan. (Beth Ruiz)
