BUTUAN CITY – Nagpadayon pa ang gihimong imbestigasyon sa mga kapulisan sa Sison Municipal Police Station subay sa pagpusil-patay sa usa ka pumpboy sa maong lugar.
Sa pakighinabi ning sibyahan, gibutyag ni PSI Jun Montenosa, hepe sa Sison Municipal Police Station, nga naila ang biktima nga si Anthony Nibaya Jabonero, 19, ulitawo ug residente sa Brgy. Bobonawon, Mainit, Surigao del Norte.
Sigon niini, nga usa matud pa ka pumpboy sa usa ka gasolinahan sa may Brgy. Luna, syudad sa Surigao ang nasangpit nga biktima.
Base sa inisyal nga pagpanubay, nasayran nga samtang padulong ang biktima sa iyang trabaho sakay sa usa ka single-motor bandang alas- 11 ang takna sa gabie, gibabagan matud pa ang dalan niini ug usa ka troso ug sa dihang mihunong kini, dinhi na siya gipusil sa makadaghang higayon.
Matud pa nga nakadawat ug pito ka gunshot wounds ang biktima gikan sa wala pa mailang mga responsible.
Posibleng mistaken identity lamang ang panghitabo kungdiin nasaypan lamang ang biktima ug maoy na-tripan sa mga suspek tungod kay wala matud pa kini nakaaway.
Sa karon, padayon pang gawasnon ang mga suspek samtang nagpadayon pa usab ang imbestigasyon sa mga otoridad.
Nahitabo ang insidente sa may Brgy. Biyabid, sakop sa lungsod sa Sison, Surigao del Norte.
