BUTUAN CITY – Nag-atubang na karon og kasong kriminal nga pagpatay ingon man kasong administratibo ang usa ka police corporal (PCpl) human niini gipusil-patay ang usa ka tricycle driver sa Tandag City, Surigao del Sur, ning mi-aging kaadlawon.
Sigon ni Police Regional Office (PRO)13 Director BGeneral Romeo Caramt Jr., gipasakaan og kasong murder pinaagi sa inquest proceedings si PCpl Billy Joe Tindugan, 32-anyos, residente sa Brgy. Buenavista, Tandag City kinsa na-asssign sa PRO-13 headquarters ug gikostudiya na sa Tandag City Police Station.
Gimando na usab sa heneral ngadto sa Regional Investigation and Detective Management Division ang paglusad og pre-charge investigation batuk sa maong pulis alang sa ipasaka usab nga kasong administratibo.
Base sa imbestigasyon, nakig-inom ang suspek ngadto sa biktimang si Dariel Torregoza sa Brgy. Buenavista apan pag-abot sa ala-1:35 ning mi-aging kaadlawon, nagkalalis ang duruha.
Dinhi na gipusil sa pulis ang biktima diha sa iyang lawas apil na sa iyang tangkugo gamit ang 9mm pistol.
Mipasalig si Gen. Caramat nga mahatag ngadto sa kabanay sa biktima ang hustisya sa iyang kamatayon ug kamatu-uran niini ang pagpasaka na og kaso batuk sa suspetsado.
Kini isip pagsunod na usab sa kamanduan ni PNP Chief Director Gen. Romeo Caramat Jr. ngadto sa tanang mga police units nga paspasan ang priseso sa pagresoba sa mga kasong administratibo batuk sa nakasala nga mga pulis aron matangtang gilayon sa serbisyo ang mga dili ha-um musuot sa ilang uniporme.
