BUTUAN CITY- Nakaplagan nalang nga wala nay kinabuhi og naligo sa iyang kaugalingong dugo ang usa ka pulis human matud pa aksidenteng napusilan ang kaugalingon sa iyang pistola kagahapon sa alas 9:00 sa buntag sa may Purok 6, Brgy. Poblacion, Barobo, Surigao del Sur.
Naila ang biktima nga si Police Master Seargent Ale Chan Urbiztondo, 40 anyos, nga residente sa maong lugar og nadestino sa Barobo Municipal Police Station.
Sa nakuhang impormasyon ning sibyahan, daling miresponde ang ginsakpan sa Barobo Municipal Police Station human gipaabot ang maong insedente nga natigayon sa ikaduhang andana sa ilang panimalay. Aksidente matud pang mibuto ang short firearms nga Taurus TS9 caliber 9mm samtang kini gilimpiyuhan sa biktima.
Na-abtan sa miresponding kapulisan ang biktima nga dunay samad pinusilan sa ulo samtang nakit-an ang pistola diha sa lamesa.
Sa karun padayon pa ang imbestigasyon sa kapulisan aron masuta ang kamatooran sa maong insidente.
