BUTUAN CITY – Posibleng maglisod na pagbalik sa iyang serbisyo ang suspendidong pulis human kini subling nasikop sa gihimong buy bust operation pasado alas-8:58 kagabii sa may Montilla Boulevard ning siyudad sa Butuan.
Nakuha sa mga sakop sa Butuan City Police Station 1 og sa Anti-Illegal Drugs Operation team gikan sa posisyon ni PO3 Roberto Upaon, 38-anyos, minyo, residente sa Purok Pechay, Brgy. Golden Ribbon ning siyudad og nadestino kaniadto sa Regional Public Safety Battalion ang 2 ka sachets sa suspected shabu nga gibana-banang nagkantidad og 11-mil pesos, usa ka libo ka pesos nga buy bust money, cash nga 2,600-pesos og mga drug paraphernalia.
Nasayrang suspendido ang maong pulis na usa ka high value target isip pusher human nakuhaan og pipila ka gramo sa shabu sa gihimong drugs operation niadtong Septyembre ning mi-aging tuig og nasayran sa monitoring nga padayon pa gihapon sa iyang na-andang buluhaton atol sa maong operasyon. (Beth Ruiz)
