BUTUAN CITY – Gi-imbestigahan na sa Police Regional Office (PRO) 13 ang report kalabot sa usa sa ilang mga opisyal nga maoy nag-operate sa usa ka buhatan sa Kabus Padatoon kon KAPA Community Ministry International dinhi sa siyudad sa Butuan.
Sigon ni PBGen. Gilberto DC Cruz, regional director sa PRO-13, ka-uban nila ang National Bureau of Investigation kon NBI-Caraga sa pag-imbestiga sa wala pa panganling police officer nga maoy nag-manage sa KAPA office sa may Brgy. Villa Kananga.
Aminado usab ang opisyal nga daghang mga pulis ang nabiktima usab sa KAPA kondiin ang uban nahimo nang mga middle man alang sa ilang mga ka-ubanan.
Gipahimangnuan usab niya ang iyang mga sakop nga mupahawa na sa maong grupo og dili na mu-apil pa sa mga investment scams aron mahimong modelo sa mga ordinaryong tawo.
Naghatag na matud pa siya og memorandum batuk sa mga pulis nga nagpabilin pang membro sa KAPA og uban pang investment schemes.
Ubos matud pa sa iyang kadumalahan, dili niya itugot ang ingon niini.
