BUTUAN CITY – Hugot nga gikondena sa kadumalahan sa Police Regional Office kon PRO-13 ang pagpatay kang Staff Sergeant Emmanuel Lamigo didto sa iyang pinuy-anan sa Brgy. Poblacion, Marihatag, Surigao del Sur.
Si Lamigo nga nadestino sa Marihatag Municipal Police Station, gipusil sa duha ka suspetsado nga gitoohang miyembro sa CPP-NPA kaganinang alas 6:30 sa gabii.
Ang namatay nga pulis, mitambong lang sa kasaulogan sa adlaw nga natawhan sa iyang anak og mosakay na unta sa iyang motorcycle aron mobalik sa police station sa dihang kini gipusil.
Bisan og nakahiagum na og samad, misulay pa ang biktima sa pagbalos apan na-igo kini sa iyang agtang og nagkalain-laing parte sa kalawasan sa lima ka bala sa kalibre punto 45 nga pistola.
Mimandu na si PRO13 director Joselito T. Esquivel, Jr. pagset-up og dugang nga mga checkpoints aron madakpan ang mga suspetsado dungan sa pagpahigayon sa lawom nga imbestigasyon.
Gipaneguro usab sa opisyal nga mahatagan og hustisya ang nadangatan sa biktima dayung pahayag nga mohatag sila sa tanang posibleng tabang sa nabiyaan nga pamilya.
